ROXAS CITY – Natalana nga pasakaan sang nagakaigo nga panumbungon ang 19 ka mga indibidwal nga nadakpan sang mga kapulisan nga nagapatigayon sang ilegal nga bulang sa separado nga operasyon sa Capiz.
Una diri, naaresto sa Barangay Wright sa banwa sang Tapaz ang 16 ka mga indibidwal nga ginalakipan nanday Leopoldo Caballero; Rodolfo Caballero; Narciso Llorico; Mark Anthony Robles; John Gardose; Kevin Tolico; Elmer Importante; Igmedio Importante; Allan Jimenez; Michael Chiva; Gerardo Caro; Lorito Caballero kag Jimboy Chiva kun sa diin ang iban sa mga ini ang lunsay residente man sang nasambit nga banwa apang ang iban sa ila ang gikan sa banwa sang Calinog, Iloilo.
Nakuha sa mga ini ang 27 tanan ka mga pangbulang nga manok kun sa diin ang tatlo diri ang patay.
Samtang naaresto naman sa Barangay Dayhagan, sa banwa sang Pilar sanday Ricky Colmo, Reno Castor kag Gary Francisco kag nakuha sa mga ini ang walo ka patay nga mga manok nga gingamit sa bulang.
Mahibaluan nga ang nasambit nga mga indibidwal ang nagpatigayon sang bulang sa indi lisensiyado nga cockpit arena.
Magapangatubang ang mga ini sa panumbungon nga paglapas sa Presidential Decree 449 ukon Anti-Cockfighting Law kag Presidential Decree 1602 ukon Anti-Gambling Act.
