Nakabaton sang livelihood assistance nga nagabalor sang P500,000 ang 19 ka Persons with Disabilities (PWDs) sa banwa sang Pilar, Capiz paagi sa Department of Labor and Employment (DOLE) Regional Office 6 idalom sang Integrated Livelihood Program (DILP).
Ang nasambit nga bulig amo ang Commodities Store Project.
Sa interview sang Bombo Radyo kay Atty. Ailyne Valaquio-Pueblo, Head sang DOLE Capiz, iya ginpahayag nga ang nasambit nga proyekto ang may tinutuyo nga makahatag sang palangabuhian para sa mga benepisyaryo agud mapalapad ang ila economic opportunities kag malikawan ang pagdepende lamang sa bulig.
Ini nga inisyatibo ang kabahin sang “Bagong Pilipinas” vision ni President Ferdinand R. Marcos Jr. nga nagatutok sa inclusive development kag pagsiguro nga wala sang Pilipino nga mabilin sa proseso sang pag-uswag sang pungsod.
Nagpasalig man ang natungdan nga magapadayon ang suporta sini sa mga PWD kag iban pa nga vulnerable sectors paagi sa iban pa nga livelihood programs subong nga tuig.
