ROXAS CITY – Nagdepensa si 1st Barangay Kagawad Ervin Sicad sa pahayag ni Punong Barangay Einstein Okpora natuhoy sa pagka-utod sang linya sang kuryente kag tubig sa ila barangay hall sa Barangay Inzo Arnaldo, Roxas City.
Sa interview sang Bombo Radyo kay Sicad, ginpahayag sini nga bulan sang Abril kag Mayo lang ini nagpungko bilang acting punong barangay sang ila barangay humalin sang ginsuspinde si Okpora bangud sa kaso-administratibo.
Ginpahayag ni Sicad nga may yara na sang wala mabaydan nga bill sa kuryente kag tubig humalin sadtong Enero tubtob Marso antes pa ini magpungko bilang acting punong barangay.
Aminado si Sicad nga humalin sang nagpungko ini sadtong bulan sang Abril bilang Punong Barangay ginbalik niya si barangay treasurer Elma Borlado agud may yara sang nagauyat sang pondo sa ila barangay.
Apang, sang nagbalik na si Okpora sa puwesto nagresign man gilayon si Borlado.
Samtang, nagpanindugan naman ang nasambit nga barangay kagawad nga indi dapat pag-ibasol sa iya ang pagkautod sang linya sang kuryente kag tubig sa ila barangay hall.
Mahibaluan nga nadismaya si Okpora bangud sa iya pagkahibalo, may gin-appoint sadto si Sicad nga barangay treasurer apang wala gid sini ginhikot ang mga balaydan sa kuryente kag tubig sa ila barangay hall.
