ROXAS CITY – Nag-alabutan na sa probinsiya sang Capiz ang una nga batch sang mga Overseas Filipino Workers (OFW’s) nga na-stranded sa Metro Manila bangud sang ginapatuman nga lockdown tuga sang coronavirus disease (COVID-19).
Mahibaluan nga sa kabug-usan, 12 ka mga OFW’s ang nag-alabutan sa probinsiya kun sa diin 6 diri ang taga-Roxas City; 2 sa Mambusao; kag tag-1 sa Maayon, President Roxas, Panitan kag Jamindan.
Ang mga OFW’s nga residente sang Roxas City ang magatenir sa Hortus-Botanicus sa Barangay Milibili nga amo ang gindesignar sang gobyerno sang siyudad nga ila mangin quarantine facility.
Samtang ginmanduan naman ang tagsa ka mga local government units (LGU’s) sa mga kabanwahanan nga magdesignar sang quarantine facility para sa magapauli nga OFW’s nga residente sang ila nakasakupan nga lugar.
Sa karon naka-quarantine na ang nasambit nga mga OFW’s kag natalana nga magpaidalom sa polymerase chain reaction (PCR) test.
