May yara na sang bag-o nga mga Force Commander sang 1st kag 2nd Capiz Provincial Mobile Force Company (PMFC) matapos pormal nga ginpatigayon ang turnover ceremony sang Capiz Police Provincial Office (PPO) sang Setyembre 14, 2026 sa Camp Teodorico C. Apil, Barangay Lanot, Roxas City.
Ginpangunahan ang seremonya ni Police Colonel David L. Cachumbo Jr., Provincial Director sang Capiz PPO, bilang kabahin sang pagbalhin sang magapamuno sa duha ka operational units sang kapulisan sa probinsya.
Sa turnover ceremony, pormal nga ginpasa ni Police Lieutenant Colonel Francisco D. Paguia ang iya posisyon bilang Force Commander sang 2nd Capiz PMFC kay Police Lieutenant Colonel Lumyaen D. Lidawan, nga amo na ang magapanguna sa amo nga unit.
Samtang, si Police Lieutenant Colonel Paguia amo naman ang bag-o nga Force Commander sang 1st Capiz PMFC, nga nagbulos kay Police Major Alfred V. De Leon, nga nagserbe bilang Officer-in-Charge sang unit.
Sa iya mensahe, ginpabutyag ni Police Colonel Cachumbo ang importansya sang maayo nga pagpamuno, dedikasyon kag pag-isa sang mga police personnel agud masiguro ang epektibo nga pagtuman sang mandato sang PNP sa pagpabilin sang kalinong kag katawhay kag pagproteher sa komunidad.
Nagpasalamat man ang Capiz PPO sa mga nagligad nga commanders bangud sa ila dedikado nga pagserbisyo kag ginpahayag ang bug-os nga suporta kag pagsalig sa bag-o nga mga Force Commander sa ila pagsabat sang mga responsibilidad.
