ROXAS CITY – Nagsugod na ang rollout sang 4th dose sang COVID-19 vaccine nga amu ang ginatawag mga 2nd dose sang booster shot, sa probinsya sang Capiz.
Ini ang ginkumpirmar ni Dr. Alex Nolasco, OIC head sang Capiz Provincial Health Office, sang mainterview sang Bombo Radyo.
Suno diri, naghatag na sang ‘go signal’ ang Department of Health (DOH) sa pagturok sang ika-duha nga dose sang booster shot sa mga 18-anyos pataas nga makabig immunocompromised individuals.
Ini ang mga ginalakipan sang may comorbidities kaangay sang may Cancer, AIDS, steroid treatment ukon mga bed ridden kag iban pa nga may balatian.
Apang, ginpahayag ni Nolasco nga tuman ka nubo pa sang numero nga nagpabakuna sang 1st dose sang booster shot sa Capiz.
Sandig sa ginpaguwa nga datos sang Capiz PHO as of April 27, 2022 halimbawa sa Roxas City nga may pinakamadamo nga fully vaccinated nga nagdangat sa 123,331 may yara pa gid lamang sang 19,120 nga nakabaton sang ila first dose sang booster shot.
Bangud sini, nagapanawagan ang opisyal sang Capiz PHO sa mga fully vaccinated sa Capiz nga magpaturok na sang ila booster shot, agud mahibaluan ang kwalipikado nga makabaton sang second booster shot.
Nahibaluan nga tatlo ka bulan pagkatapos sang ika-duha nga dose sang COVID-19 vaccine, mahimo na makapaturok sang 1st dose sang booster shot ang isa ka indibidwal.
Nagalaum si Nolasco nga pagabuylogan ini sang mga Capiznon, bangud napamatud-an na nga dako ang bulig bilang proteksyon sang bakuna batuk sa naga-eksister sa gihapon nga COVID-19 pandemic.
