ROXAS CITY – Nag-negatibo sa 2019 novel coronavirus-acute respiratory disease (nCoV-ARD) ang lalaki nga una nga napagkit nga Person Under Investigation (PUI) sa probinsiya sang Capiz matapos makitaan sang mga sintomas sang amo nga balatian.
Ini ang ginkompirmar mismo ni Provincial Health Officer Dr. Samuel Delfin sang mainterview sang Bombo Radyo.
Suno kay Delfin nga matapos nga ginpadala ang sample specimen sang nasambit nga persona sa Research Institute for Tropical Medicine (RITM) sa Alabang, Muntinlupa City, nagguha sa resulta nga negatibo ini sa nCoV.
Nakaguha naman sa ospital ang amo nga persona suno kay Delfin kag makabig na lamang karon nga Person Under Monitoring (PUM).
Ang nasambit nga persona amo ang isa ka 51 anyos nga lalaki nga may yara sang travel history sa Hongkong kag Macao sadtong Enero 25 tubtob Enero 29, 2020 antes nakapauli sa probinsiya.
Samtang, ginpahayag naman ni Delfin nga nagapabilin sa karon nga naka-confine sa ospital ang ikaduha nga PUI nga napagkit sa Capiz samtang ginahulat man ang resulta sang eksaminasyon nga ginpatigayon sang RITM sa ila ginpadala nga sample specimen.
Ang ikaduha nga PUI amo ang isa ka 43-anyos nga babaye nga 17 na katuig nga nagatrabaho bilang domestic helper sa Hongkong apang sadtong Enero 19, 2020 nagpauli ini para magbakasyon.
