Gin-athag ni 1Tahanan Party-list Representative Nathaniel Oducado nga wala nalakip ang iya pangalan sa nagalapta nga listahan sang mga kongresista ginaalegar nagpirma sa report sang House justice panel nga naga-rekomendar sang impeachment ni Sara Duterte.
Sa interview sang Bombo Radyo kay Oducado, iya ginpahayag nga indi na dapat pagpalapta ang impormasyon nga wala man napamatud-an bangud mahimo ini nga maghatag sang sala nga paghangop sa publiko.
Suno sa iya, dapat responsable kag maalam ang mga influencers kag content creators sa paggamit sang social media ilabi na kun may kaangtanan sa mga sensitibo kag importante nga isyu sa pulitika.
Pahayag pa sini, dapat anay usisaon kag beripikahon ang impormasyon antes ini ipaguwa sa publiko agud malikawan ang paglapta sang indi matuod nga balita.
Samtang nagapadayon ang isyu may kaangtanan sa impeachment complaint batok kay Vice President Duterte, nagpahayag man si Oducado sang handom nga mangin patas kag base sa konsensya ang pagboto sang iya mga kaupdanan sa Kamara.
Dugang pa sang natungdan nga kinahanglan nga mangin matinlo kag patas ang proseso agud mapabilin ang pagsalig sang publiko sa institusyon sang gobyerno kag sa sistema sang hustisya sa pungsod.
