ROXAS CITY – Gintupok gid sang kalayo ang ginaparentahan nga duha ka mga puluy-an sa Mendoza Urban, San Roque Street, Barangay Inzo Arnaldo, Roxas City.
Mahibaluan nga ang nasambit nga balay ang ginapanag-iyahan sang isa ka retirado nga pulis nga si Alexmar Albaran sang Barangay Milibili, sining siyudad.
Madasig nga naglapta ang kalayo bangud human ang nasambit nga balay sa mixed light materials.
Ang duha ka mga balay ang gina-rentahan kun sa diin ang isa diri ang ginarentahan ni Divina Flaga, 34 anyos sang Barangay Nasunugan, Dao, kaupod ang iya duha ka mga kabataan kag tiyo samtang ang isa ka balay ang gina-rentahan naman sang mag-asawa nga sanday Police Staff Sergeant Aljon Berdugo, miyembro sang Provincial Drug Enforcement Unit kag manunudlo sa Culasi National High School nga si Juvy Berdugo.
Suno sa Bureau of Fire Protection-Roxas City Fire Station, padayon pa nila sa karon nga ginapadalman ang ila imbestigasyon natuhoy sa gintunaan sang sunog kag kun pila ang tul-id nga kahalitan nga natuga sini.
