ROXAS CITY – Nagpatigayon sang duha ka adlaw nga symposium ang Unilab Foundation kag HeadsUPPH sa Gerry Roxas Convention Center nga may tig-ulo #MindYourHealth Positive Well Being and Happiness.
Ini ang kasunod sang makalaalarma nga pagsaka sang kaso sang suicide ukon paghikog sa siyudad sang Roxas kag probinsiya sang Capiz.
Nagpasakop sa nasambit nga symposium ang pila ka mga estudyante gikan sa nagkalain-lain nga mga eskwelahan, mga youth leaders, school administrators, city kag provincial health office.
Sa iya nga mensahe, ginpahayag ni City Mayor Ronnie Dadivas ang mga inisyatibo kag mekanismo sang gobyerno sang siyudad natuhoy sa isyu sang mental health kag suicide.
Ini ang ginalakipan sang pagtukod sang suicide squad kag pagpahamtang sang hotline nga mahimo matawgan sang mga indibidwal nga nagakinahanglan sang bulig.
Ginhinyo man sang alkalde ang kooperasyon sang publiko ilabi na sa mga kabataan para sa kawsa sang siyudad natuhoy sa amo nga isyu.
Mahibaluan nga naglab-ot na sa 32 ang reported suicide cases sa probinsiya sang Capiz kun sa diin 13 diri ang lunsay taga-Roxas City.
(PHOTO FROM RCCG)
