ROXAS CITY – Arestado ang duha ka mga drug suspek sa ginkasa nga drug buybust operation sang mga katapo sang Station Drug Enforcement Team sang Roxas City Police Station sa Barangay Loctugan, Roxas City.
Ginkilala ang mga nadakpan nga sanday Denver Bernas, 33 anyos, residente sang Barangay Mongpong kag Christopher Almojin, 31 anyos sang Barangay Loctugan.
Narekober sa mga suspek ang tatlo tanan ka sachets sang shabu, kag 500 pesos nga marked money.
Suno kay Punong Barangay Lilian Cordinillo, una na nga nadakpan sang mga kapulisan si Almojin bangud man sa pagduso sang ilegal nga droga apang nahilway ini pinaagi sa plea bargaining agreement.
Sa baylo nga mag-untat, liwat nga nagbalik sa iya ilegal nga aktibidad si Almojin rason nga liwat ini nga nadakpan.
Suno naman kay Police Lt. Col. Ricardo Jomuad, hepe sang Roxas City PNP, halos tatlo ka semana nila nga gin-monitor ang ilegal nga aktibidad sang mga suspek antes nila ginkasa ang nasambit nga operasyon.
