ROXAS CITY – Ginkumpirmar sang barangay secretary sang Barangay Culasi sining siyudad nga may yara sang duha ka mga apo nga nagpauli sa probinsya ang isa ka COVID-19 patient nga ginbawian sang kabuhi nga residente sang Sitio Sakop nga wala sang koordinasyon sa mga otoridad.
Suno kay Brgy. Sec. May Necesario nga may yara sang duha ka mga apo nga nagikan sa Metro Manila kag nag-abot sa nasambit nga lugar ang napatay nga 68-anyos nga COVID-19 patient nga wala sang koordinasyon sa mga opisyales sang barangay.
Ginpahayag ni Necesario nga isa ka babaye kag lalaki ang nagakadto sa ila barangay nga apo sang amo nga pasyente kag lunsay mga residente sang Barangay Sibaguan sining siyudad.
Nahibaluan nga nagakadto lamang sila sa Barangay Culasi bangud may yara sila sang tiangge sa amo nga lugar.
Ginapatihan nga posible isa ini sa mga rason kun sa diin ginapahayag nga nagdala sang virus sa ila nga lolo nga nagresulta sang pagpositibo sa COVID-19 kag ginbawian pa sang kabuhi samtang ginabulong sa ospital.
Dugang pa ni Necesario nga indi pa mapat-ud kun sa diin nag-agi ang duha sini ka mga apo apang ginapahayag nga wala sila nagpakig-angut sa mga otoridad sa ila nga pagpauli sa probinsya.
Sa karon, padayon pa nga ginahibalo sang mga natungdan nga mga otoridad kun sa diin naghalin ang duha ka mga apo sang COVID-19 patient antes nakapauli diri sa probinsya sang Capiz.
