ROXAS CITY – Nagapabilin sa karon sa idalom sang Enhanced Community Quarantine (ECQ) ang Barangay Poblacion kag Barangay San Jose sa banwa sang Dumalag, Capiz.
Ini ang ginpahayag ni Police Lieautenant Tobias Garfin, hepe sang Dumalag Municipal Police Station sang mainterview sang Bombo Radyo.
Suno kay Garfin nga sandig ini sa Executive Order No. 014-2020 ni Mayor Amado Eriberto Castro.
Nagsugod ini sadtong Hulyo 14 kag magalawig tubtob sa Hulyo 28, 2020.
Kasunod ini sang pag-positibo sa coronavirus disease (COVID-19) sang duha ka mga locally-stranded individuals (LSI’s) nga lunsay residente sang amo nga banwa nga nagaedad sang 69 kag 27 anyos nga lunsay kalalakinhan.
Suno kay Garfin nga katuwang nila sa hugot nga pagpatuman sang mga pagsulundan sa idalom sang ECQ ang mga miyembro sang Barangay Health Emergency Response Team (BHERT), Barangay Health Workers (BHW’s), barangay officials kag katapo sang Rural Health Unit sang amo nga banwa.
Suno diri nga hugot nga gina-implementar ang curfew hour humalin alas 8 sa gab-i tubtob alas 4 sa aga kag 24-hour curfew naman para sa mga naga-edad sang 21 anyos panubo kag senior citizens.
