ROXAS CITY – Nakahunong na karon sa karsel sang Roxas City PNP ang duha ka mga drug personalities nga naaresto sa ginpatigayon nga drug buy bust operation sang Station Drug Enforcement Team sang Roxas City PNP sa Barangay Cagay, Roxas City.
Kalakip sa mga nadakpan sanday Benjie Gonzales 47-anyos sang nasambit nga lugar kag Michael Bergantinos 42-anyos sang Barangay Punta Tabuc, sining siyudad.
Narekober sa posesyon sang mga suspek ang walo ka sachets sang ginapatihan shabu nga ginabulubanta nagabalor sang P7,000, isa ka unit sang cellphone kag 500 pesos nga marked money.
Ginpahayag ni outgoing punong barangay Moreno ‘’Moring’’ Gonzaga sang Barangay Cagay nga isa si Gonzales sa tatlo ka mga drug personalities sa ila barangay yara sa listahan sang kapulisan nga validated sang BADAC.
Wala man ini mapaidalum sa tokhang bangud lulubog lilitaw ang estilo ni Gonzales sa tion nga mabatyagan sini nga mainit na siya sa kapulisan, hinali ini nga nagabiya sa ila lugar.
Samtang magapangatubang sang panumbungon nga paglapas sa Republic Act 9165 ukon Comprehensive Dangerous Drugs Act of 2002 sanday Gonzales kag Bergantinos.
