ROXAS CITY – Natalana nga pasakaan sang panumbungon nga paglapas sa Republic Act 9165 ukon Comprehensive Dangerous Drugs Act of 2002 ang duha ka mga drug suspect nga nadakpan sa ginkasa nga drug buybust operation sang mga kapulisan sa boundary sang Barangay Milibili kag Barangay Lawaan, Roxas City.
Ginkilala ang mga nadakpan nga sanday Gilbert Marcelino, 38 anyos sang Barangay Tanza kag James Villareal, 29 anyos sang Barangay Bolo, sining siyudad.
Suno kay Police Master Sergeant Ramil Arcangeles sang Roxas City Police Station, halos duha ka bulan ang ginpatigayon nga monitoring sang kapulisan antes ginkasa ang nasambit nga operasyon.
Ginapahayag nga nagtuyo pa kuntani ang mga drug suspect nga magbato sa mga otoridad rason nga nag-warning shot pa ang mga pulis.
Narekober sa posisyon sang mga suspek ang 11 tanan ka sachets sang ginapatihan shabu nga nagabug-at sang 15 grams kag ginabulubanta nagalab-ot sa P195,000 ang estimated market value.
Magluwas diri, narekober man sa mga suspek ang P29,000 nga boodle money, P1,000 nga buybust money kag mga drug paraphernalia.
Sa karon, nakahunong na sa karsel sang Roxas City Police Station ang mga drug suspect.
