ROXAS CITY – Pilas sa magktuhay nga parte sang lawas ang naangkon sang duha ka indibidwal, matapos ginapahayag ginbuno samtang nagapungko sa ila motorsiklo sa Poblacion, Tapaz, Capiz.
Ginkilala ang mga biktima nga 17-anyos Grade 9 nga residente sang nasambit nga lugar kag 21-anyos nga residente naman sang Barangay Tabon sa amu nga banwa.
Samtang ang ginatudlo suspek ang nagapang-edaron sang 19-anyos kag residente sang Poblacion, Tapaz, Capiz.
Sa impormasyon nga nakuha sang Bombo Radyo nagikan sa Tapaz Municipal Police Station, ginapahayag nga samtang nagapungko ang mga biktima sa ila motorsiklo nga yara sa higad sang dalan hinali na lamang nga ginpangbuno ang mga ini sang suspek.
Nag-angkon sang pilas ang tyan ang 17-anyos nga biktima samtang pilas naman sa tyan kag wala nga butkon ang naangkon sang 21-anyos nga biktima.
Gilayon man nga ginpadangat ang mga ini sa Tapaz District Hospital para sa nagakaigo nga pagbulong.
Ginapahayag nga yara sa impluwensya sang makahulubog nga ilimnon ang amu ng suspetsado.
Sa karun, padayon pa nga gina-ayam sang Tapaz MPS ang suspek matapos madasig nga makapalagyo matapos makumiter ang krimen.
