ROXAS CITY – Nakabalhag sang 2 ka kaso sang suspected human rabies ang probinsya.
Ini ang ginpahayag ni Dr. Cheyz Descalsota Veterinarian III sang Office of the Provincial Veterinary, sang ma-interview sang Bombo Radyo.
Suno kay Descalsota, ang nasambit nga duha ka kaso ang nagikan sa banwa sang Tapaz kag Sapian.
Ginpahayag man sini nga base sa ila datos sumugod Enero tubtob subong nga bulan sang Mayo may yara sang 1 ka kaso sang animal rabies kag 7 ka probable cases kung sa diin 5 diri ang nakumpirmar nga positive matapos ang ginapatigayon nga test.
Ginklaro man ni Descalsota nga indi tanan nga sapat nga nakakagat may yara sang rabies bangud kung ang isa ka ido ukon kuring yara lamang sa sulod sang puluy-an kag wala nagalagaw sa guha, indi ini matawag nga delikado apang kung nakagat ang indibidwal sang isa ka layaw nga ido ukon kuring delikado ini bangud posible nga nalatnan na ini sang rabies kag mahimo nga malaton sa tawo ukon sapat nga iya makagat ukon makalaway sa open wound ukon pilas.
Importante man suno diri nga obserbahan sang 10-14 diyas ang sapat nga nakakagat kung may yara sang pagbag-o diri.
Mahibaluan nga ang rabies isa ka sahi sang virus nga nagadala sang ensipalitis sa mga sapat nga mainit ang dugo.
Pila sa mga senyales nga may yara sang rabies ang ido ukon kuring amu ang mga masunod:
*Hallucinations
*Sensitibo sa suga ukon silak sang adlaw
*Insomnia
*Pagnilaway ukon pagbula sang bibig
*Hydrophobia ukon pagkahadlok sa tubig
*Pagiging agresibo ukon pagiging sensitibo kag
*Nabudlayan sa pagtulon sang pagkaon.
Pahanumudm sini nga pananglitan makagat, makawris sang ido ukon kuring gilayon nga magpakonsulta sa animal bite center agud maturukan sang anti rabies kag anti tetanus.
