Duha ka mga mamalidha halin sa Northern Luzon ang ginadudahan nga utak sa likod sang multi-billion peso illegal operation sang pag-ubra kag pagbaligyan sang sigarilyo, suno kay Interior Secretary Juanito Victor “Jonvic” Remulla.
Ini matapos nga gindakop sang mga awtoridad ang anom ka mga Chinese kag maluwas ang 60 ka mga pilipino nga mamumugon sa ginpatigayon nga raid sa iligal nga pabrika sang sigarilyo sa Barangay Panipuan sa Mexico, Pampanga.
Suno kay Remulla, nag-operate nga wala sang mga lisensya kag permit ang planta sa bilog nga bulan sang Enero 2026. Ginabulubanta naglab-ot sa mas ukon menos P4.5 billion ang balor sang mga sigarilyo nga ila naubra.
Ginsiling ni Remulla nga nakabaton sang impormasyon ang Department of the Interior and Local Government (DILG) nga nag-umpisa ang operasyon sang Enero 1. Suno sa iya, natukod na ang makina sang Disyembre antes pa man mag-abot ang mga Chinese.
Dugang pa niya, biktima sang human trafficking ang mga Pilipino nga mamumugon sa amo nga pabrika.
Sandig sa DILG, ginpilit sang mga employer ang mga biktima nga magtrabaho nga wala sang sweldo kag sa idalom sang indi maka-tawo nga mga kondisyon.
Ginsiling man ni Remulla, nga wala sang piyansa ang mga kaso nga human trafficking kag paglapas sa Anti-Agricultural Sabotage Act.
Ginkilala sang DILG ang mga incorporator sang bodega nga tatlo ka mga Pilipino kag duha ka mga Koreano.
Samtang, suno kay PNP Criminal Investigation and Detection Group (CIDG) Director Robert Morico II, nakapadala na sila sang subpoena sa isa sa mga Pilipino nga incorporator.
Sa isa ka pahayag, ginsiling sang PNP nga nakakita sila sang pagkapareho sa mga peke nga sigarilyo nga nakit-an sa Mexico, Pampanga, kag sa mga nauna nga operasyon sa Balete, Batangas sang Disyembre 31, 2025, kag sa Malabon sang Enero 1, 2026.
Gindugang pa ni Remulla, nga nadulaan ang gobyerno sang Pilipinas sang masobra ₱30 billion sa excise taxes sa kada-tuig bangud sa iligal nga transactions sang tabako.
