ROXAS CITY – Dead on arrival ang 24-anyos nga lalaki samtang pilason naman ang isa matapos ang nagluntad nga pagpangluthang alas 11:20 kagab-I, Oktubre 17 sa Barangay Sta. Fe, Pilar Capiz.
Ginkilala ang napatay kay Hadjade dela Vega Bernat, 24-anyos samtang ang napilasan ang ginkilala kay Uldarico dela Vega Alapane, 26-anyos lunsay residente sang Brgy. San Pedro sa nasambit nga banwa.
Samtang ang suspek amu si Junrey Basquez, yara sa legal nga pang-edaron, residente sang nasambit nga lugar.
Sandig sa imbestigasyon sang Pilar MPS, kaupod nga naga-inom-inom ang mga biktima kag suspek sa balay ni alyas ‘Hurong Soriano’ sa Brgy Casanayan, sang nagpatunga ang indi pag-intindihay kag pagbinaisay rason nga nag-una nga nagpauli ang suspek kag ginsingitan ang mga biktima nga magabalik pa ini.
Wala nagdugay, nagdesider ang duha nga magpauli, samtang ginasubay ang dalanon, ginapahayag ginbangga-an ang mga ini sang suspek kag gilayon nga ginluthang si Alpane sang makaduha ka beses kag na-igo sa natuo nga likod kag paa.
Apang natigayon nga nakapalagyo si Alapane kag dimalas nga nabilin si Bernat kun sa diin ginluthang man ini ni Basquez sang makatatlo ka beses sa nagkatuhay nga parte sang lawas.
Madasig nga ginpadangat sa Bailan District Hospital ang mga biktima para sa pagbulong, apang wala makasalbar sa kamatayon si Bernat.
Samtang, matapos ang natabo nga pagpangluthang, gilayon nga nagpalagyo ang suspek kag padayon nga gina-ayam sang kapulisan.
Nagapadayon naman ang imbestigasyon angut sa insidente.
