ROXAS CITY – Nagapabilin sa Bailan District Hospital sa banwa sang Pontevedra ang isa ka 16-anyos nga lalaki matapos nga ginaalegar napilasan sa pagkarerahay sang motorsiklo sa Barangay Tuburan, Maayon, Capiz.
Ang nasambit nga biktima ang residente sang Barangay Manayupit sa nasambit nga banwa.
Sandig sa inisyal nga imbestigasyon sang Maayon Municipal Police Station nga nagkasugot ang nasambit nga biktima kag abyan sini nga naga-edad man sang 14-anyos sang Barangay Bongbongan sa amo man nga banwa kag samtang nagakarerahay sang ila motorsiklo sang hinali na lamang nga nasanggit sang motorsiklo sang 16-anyos ang steering handle sang motorsiklo sang 14-anyos.
Bangud diri, natumba ang duha ka motorsiklo kag nag-angkon sang mga kasamaran sa lawas ang mga biktima nga gilayon naman gindapatan sang nagakaigo nga pagbulong.
