ROXAS CITY – Kapin sa apat ka mga indibidwal kalakip ang duha ka mga CEO sang Double your money investment scheme ang ginpasakaan sang panumbungon nga large scale estafa sa Roxas City Prosecutors Office.
Kalakip diri sanday Junelyn Obamos Gregorio sang 25 days double your money investment scheme, Patroceño Don Chiyuto sang Chiyuto Double your money investment scheme kag kaupod sini nga sanday Judy Fajarillo sang Cavite kag Felomina Andrada sang Barangay Adlawan, Roxas City.
Ginpahayag ni Atty. Arnold Diaz, Supervising Agent sang NBI-Region 6 nga sa bahin ni Chiyuto, 15 ang mga complainant nga nagpasaka sang panumbungon sa ila nga tatlo samtang 16 naman ang complainant kay Gregorio.
Suno sa opisyal nga tanan nga mga complainant ang may mabakud nga ebedensiya agud matum-ok ang apat sa ila pagpanunto.
Nahibaluan pa nga ini pa lamang ang una nga batch sang mga investors nga nagkaisog para pasakaan sang kaso ang mga scammer nga nagpasalig nga ibalik ang ila investment, apang tobtob sa karon wala ini mabalik.
