ROXAS CITY – Pilason ang duha ka mga driver sang motorsiklo matapos nga nagbungguanay sa national highway sang Barangay Salocon, Panit-an, Capiz, alas-11:30 kagab-i sang Domingo.
Ginkilala ang biktima kay John Denolo Degala, 38-anyos, driver sang Honda Click 125 nga motorsiklo, empleyado sang pribado nga ospital kag residente sang Brgy. Duyoc, Dao, Capiz.
Samtang ang nakabunggo ang ginkilala kay Ian Badhay Valentino, 22-anyos, driver sang Mitsukoshi Daan-Hari 125 nga motorsiklo, delivery helper sang CALS kag residente sang Brgy. Capagao, Panit-an, Capiz.
Sandig sa inisyal nga imbestigasyon sang mga katapo sang Panit-an MPS, papuli ang biktima sa Dao nagikan sa Roxas City, samtang ang suspek ang padulong sa direksyon pa syudad sang Roxas.
Apang, ginaalegar nga nadulaan sang kontrol sa manubela si Valentino, rason nga nabungguan sini ang kasugata nga si Degala.
Nagtabog sa ila tagsa-tagsa nga motorsiklo ang mga driver kag nag-angkon sang kapilasan sa magkatuhay nga parte sang kalawasan.
Ginpadangat sa ginatrabahuan nga ospital ang biktima, samtang ang nakabunggo ang gindala sa Bailan District Hospital.
Nakakustodiya ang mga motorsiklo sa Panit-an MPS samtang nagapadayon ang imbestigasyon.
