ROXAS CITY – Arestado ang tricycle driver kag barangay health worker sa ginkasa nga drug buybust operation sang gintingub nga puwersa sang Roxas City PNP kag Philippine Drug Enforcement Agency (PDEA) sa Barangay Tanza, Roxas City.
Ginkilala ang mga naaresto nga sanday Amando Anonat, 35-anyos kag Elvie Albaladejo, 48-anyos nga lunsay mga residente sang nasambit nga lugar.
Sa interview sang Bombo Radyo sa tagpamaba sang Roxas City Police Station nga si Police Master Sergeant Ramil Arcangeles nga madugay na nila ini nga ginamonitor rason nga natigayon nga madakpan ang mga drug suspek sa pagduso kag paggamit sang iligal nga droga.
Narekober sa posisyon sang mga ini ang 11 tanan ka sachets sang shabu nga nagabug-at sang 8 gramos kag may market value nga P54, 000, P1,000 nga buybust money kag isa ka cellphone.
Magapangatubang sang panumbungon nga paglapas sa Republic Act 9165 ukon Comprehensive Dangerous Drugs Act of 2002 ang mga drug suspek.///END
