ROXAS CITY – Arestado ang duha ka mga lalaki matapos nga ginreklamo bangud sa pagpinalupok sang armas-luthang sa Sitio crossing Ramos, Barangay Bungsuan, Dumarao, Capiz.
Ginkilala ang mga nadakpan nga sanday Art Flores Piral, 29-anyos, kag Andy Evaristo Garcia, 19-anyos, lunsay mga helper sa poultry kag mga residente sang nasambit nga barangay.
Sandig sa impormasyon nga nakuha sang Bombo Radyo sa Dumarao MPS, nga antes nadakpan ang duha ka mga persona, may nagpalab-ot nga concerned citizen kay PSMS Jason Arcangeles angut sa pagpinalupok sang duha sa amu nga lugar.
Gilayon nga nagpadulong ang hubon sang mga kapulisan kag natigayon ang mga ini nga naaresto sa Sitio Badbaranan, Brgy. Dacuton, sa amu man nga banwa.
Narekober sa kontrol kag posesyon ni Piral ang 1 ka unit sang caliber .45 TAURUS pistol nga may 1 ka bala, 2 ka magazine nga may 13 tanan ka bala, 1 pa ka armas nga nasulod sa holster kag 1 ka Yamaha MIO 125 nga motorsiklo.
Sa karon, yara ang mga ini kag ang nakumpiskar sa ila sa paghinakup sang Dumarao MPS para sa nagakaigo nga disposisyon kag pagpasaka sang kaso nga paglapas sa RA 10591 ukon “Comprehensive Firearms and Ammunition Regulation Act.”
Sa dugang nga imbestigasyon, namutikan nga yara sa impluwensiya sang makahulubog nga ilimnon ang nagkaladakpan.
