ROXAS CITY – Duguon nga nasapwan ang duha ka mga lalaki sa isa ka talyer sa Barangay Punta Tabuc, Roxas City, alas-9:30 kagab-i sang Huwebes, Agosto 4.
Ginkilala ang mga persona nga sanday Mark Anthony Ballos, sa legal nga pang-edaron, kag Richie Lozada, 37-anyos, pamilyado nga lunsay mga residente sang nasambit nga barangay.
Sandig sa inisyal nga imbestigasyon ni PSMS Anthony Bibit KAG PSSg Johnry Casipit, mga imbestigador sang Roxas City PNP, nga nagsugod sa pag-inom-inom ang duha mga alas-5 sa hapon, apang mga alas-9:30 sa gab-i, nakit-an ang mga ini sang nagreport sa mga kapulisan nga si Ruzel Faustino, babayi kag residente man sang amu nga lugar, nga duguon na ang duha kag may mga pilas sa magkatuhay nga parte sang ila lawas.
Ginpadulongan sang mga katapo sang RCERT kag gindapatan sang pagbulong antes gindala sa ospital si Ballos sa RMPH, samtang gintransfer sa isa ka pribado nga ospital si Lozada nga amu ang may madamo nga dugo nga nadula sa lawas.
Sa pagpangusisa sang kapulisan sa duha, indi man makahatag sang dugang nga impormasyon ang mga ini kun ano ang natabo nga gintunaan sang ila pagkapilas.
Nakit-an man ang buka’ nga botelya sang makahulubog nga ilimnon sa idalom sang folding bed nga ila ginahamtangan.
Sa karon, nagapadayon ang imbestigasyon kag nagapabilin nga naka-admit ang mga ini sa nasambit nga ospital sa istable na nga kondisyon.
