Padayon ang ginapatigayon nga imbestigasyon sang mga otoridad may kaangtanan sa nakita nga bag-o bun-ag nga lapsag nga lalaki nga gin-abandonar sa Sitio Proper, Barangay Agtatacay Norte, Sapian, Capiz.
Sa interview sang Bombo Radyo kay Police Lieutenant Steve Ian Bautista, OIC sang Sapian MPS, iya ginpahayag nga sandig sa ila imbestigasyon, nagaguwa nga may duha ka mga persona, isa ka babayi kag lalaki nga sakay sang nagaduag orange nga traysikol ang nagpundo sa nasambit nga lugar.
Ang lalaki suno diri ang nagbilin kag nag-abandonar sang amo nga lapsag nga lalaki sa bahin sang gate sa isa ka panimalay sa amo nga barangay.
Matapos ang natabo, madasig nga nalagyo ang amo nga mga persona padulong sa direksyon sang Barangay Bilao sang amo man nga banwa.
Dugang pa sini, bangud sa pagbinuligay sang mga pumuluyo sa lugar, madasig nga gindala sa isa ka ospital ang lapsag nga sa karon yara na sa estable nga kondisyon kag healthy.
