ROXAS CITY – Naghatag karon sang panugdaon ang duha ka mga city councilors angut sa pila ka mga kontrobersiyal nga isyu sa syudad sang Roxas.
Sa exclusive interview sang Bombo Radyo kanday City Councilors Jericho Celino kag Midelo Ocampo, ginpalayag sang mga konsehal ang ila opinyon kag panindugan sa isyu kasubong sa pagviral sa social media sang tuman ka mahal nga pagpanukot sang pamasahe sang duha ka mga tricycle drivers sa mga bisita nga nagtambong sa eleksiyon sang Philippine Councilors League (PCL) Capiz Chapter.
Ginhatagan pagtamud ni Konsehal Celino ang natuhoy sa pagviral sa social media sang reklamo sang mga pangayaw nga ginsukot sang mahal nga pamasahe.
Aminado ang opisyal nga indi ini pabor nga himoon venue sang reklamo ang social media, bangud may nagakaigo nga ahensiya para mapalab-utan sang anuman nga hibubun-ot.
Suno kay Celino may yara sang proper forum para sa mga reklamo sa diin pinaagi diri mahatagan sang due process nga makasabat ang mga ginareklamo kag nagareklamo.
Ginapanindugan sini nga indi tanan nga reklamo ukon sentimyento ang kinahanglan ipaagi sa social media, bangud maayo nga magkita ang magtimbang nga bahin sa proper venue
Ginklaro pa sini nga wala siya sang may ginaapinan, sa diin ang iya amo ensakto kag patas lamang sa magtimbang nga bahin.
Indi maayo suno kay Celino nga bangud sa kaakig sa tricycle driver nga nakahimo sang sala sa isa ka pasahero, madalahig ang nagahimo sang maayo.
Pabor man si Konsehal Ocampo sa nangin panindugan ni Celino nga dapat mangin responsable man ang tagsa tagsa sa ila ginapost sa social media kag dapat ipaagi sa proseso.
Suno sa opisyal nga indi dapat madalahig ang maayo nga mga drivers sa indi maayo nga ginahimo sang bentahoso nga mga drivers.
Kinahanglan suno kay Ocampo nga mangin responsable man ang mga drivers kag well informed sila sa mga ordinansa sang syudad kalakip man ang mga laye trapiko.
Nagapati man ini nga dapat nga magpaidalum sa trainings kag seminars ang mga drivers agud ila mahibaluan kun pila lamang ang dapat mangin plete sang mga pasahero.
