ROXAS CITY – Yara na sa istable nga kondisyon ang duha ka mga sakay sang top-down nga motorsiklo, matapos maaksidente sa Barangay Balijuagan, Roxas City.
Ginkilala ang driver sang Kawasaki Barako 175 kay Noel Lipardo, 44-anyos, samtang ang angkas sini amu si Choey Fuentes, 29-anyos, lunsay mga residente sang Barangay Najus-an, Mambusao, Capiz.
Sandig sa pagpakig-angut sang Bombo Radyo sa mga kapulisan nga suno sa mga nakakita sa aksidente, nagikan sa isa ka namatyan sa banwa sang Mambusao ang duha kag padulong sa syudad sang Roxas, apang pag-abot sa Brgy. Cudian, nag-ekis-ekis na ang amu nga top-down kag bumunggo sa haligi sang welcome sign sang Roxas City nga sakup na sang Brgy. Balijuagan.
Nahibaluan nga yara sa impluwensiya sang makahulubog nga ilimnon ang duha.
Sa karon, padayon ang mga ini nga ginabulong sa Roxas Memorial Provincial Hospital (RMPH) kag bugtaw naman ang driver sang traysikol matapos nga may dugo nga nagguwa sa iya dulunggan.
