ROXAS CITY – Natalana nga pasakaan sang panumbungon sa Lunes nga adlaw ang duha ka mga persona matapos gin-akusaran kag ginsumbag ang imbestigador sang Roxas City Police Statìon.
Ginkilala ang mga suspek nga sanday Razel Mangalindan kag Mia Mae Gonzales.
Suno kay Police Master Sergeant Ronnie Recto, imbestigador sang Roxas City Police Station nga “unjust vexation” ang igapasaka nga kaso batuk kay Gonzales matapos sini nga gin-akusaran kag ginduro-duro ang nasambit nga imbestigador samtang “Direct Assault” naman ang igapasaka kay Mangalindan matapos ginsumbag sini sa nawong ang amo nga imbestigador.
Dugang pa ni Recto nga nagpangayo naman sang pasaylo sa iya ang duha ka nasambit nga mga suspek matapos ang natabo kun sa diin resulta lamang sang ila kahulugbon.
Ginsabat man ni Recto ang mga akusasyon batuk sa iya nga indi matuod nga yara siya sa nasambit nga party club sang nagluntad ang kinagamo kag indi matuod nga siya ang nagpakilala nga pulis matapos nga nagpangayo sang responde ang barkada sang nasambit nga mga suspek apang wala sang ginhimo nga aksyon.
Matandaan nga nagluntad ang kinagamo sa tunga sang duha ka grupo sa isa ka party club diri sa syudad sang Roxas.
Bangud diri, nagpangayo sang responde ang nasambit nga si Gonzales sa mga pulis nga yara sa lugar kag didto ginaalegar may yara isa ka persona nga nagpakilala nga isa ka pulis apang bangud wala sang aksyon nga natabo, nagdesisyon ini nga magpadulong sa Roxas City Police Station agud personal nga magpangayo sang responde kaupod si Mangalindan.
Apang pag-abot sa Roxas City PNP, nakita nila si Recto nga naggikan sa banyo kag gin-akusaran nga yara ini sa party club sa diin hinali na lamang ginsumbag ni Mangalindan ang amo nga imbestigador.
Bangud diri, temporaryo nga ginsulod sa custodial facility sang amo nga police station ang mga suspek.
