ROXAS CITY – Pilason ang isa ka persona matapos nga ginaalegar nagbungguanay ang duha ka mga motorsiklo sa Barangay Baybay, Roxas City.
Ginkilala ang biktima nga si John Paul Alarcon 20-anyos sang Sitio Nipa, Barangay Culasi sining siyudad.
Base sa imbestigasyon sang Roxas City PNP nga samtang ginasubay sang biktima ang amo nga dalanon aksidente na lamang ini nabungguan sang motorsiklo ni Jade Ralf Reyes 23-anyos kag backrider sini nga si Marvic Dela Luna 36-anyos kag lunsay mga residente sang Barangay Poblacion, Sigma, Capiz.
Bangud diri, natumba ang duha ka mga motorsiklo kag nag-angkon naman sang pilas si Alarcon samtang menor nga pilas naman naangkon ni Reyes.
Gilayon naman nga gindapatan sang first aid sang mga katapo sang BFP kag CERT si Alarcon kag gilayon nga gindala sa ospital samtang nagpamalibad naman si Reyes nga magpabulong sa ospital.
Sa karon, nagapadayon ang imbestigasyon sa nagluntad nga aksidente.
