ROXAS CITY – Dakup sa akto ang duha ka mga negosyante sang isda, matapos gintuyo nga ibaligya ang 2 ka banyera nga mat-an sa Teodoro Arcenas Trade Center (TATC) nga ginaalegar kuha sa dynamite fishing.
Ginpahayag ni Mr. Efren Diaz, market affairs consultant sang TATC nga ila na-monitor nga kuha sa dynamite fishing ang duha ka banyera nga mat-an nga isda nga dala nanday Lilian Amores, Gelo Tabura kag ang driver sang tricycle nga si Mario Aceron, lunsay mga residente sang Barangay Mongpong, sining syudad.
Ginabulubanta nga nagabug-at sang 42 kilos ang nakumpiskar nga mga isda.
Nahibaluan nga wala ginapasulod sa merkado ang amo nga isda kag sa guwa na lamang ginabaligya agud indi madakpan nga halin ini sa ginpalukpan sang dinamita.
Natalana nga i-turn over ang nakumpiskar nga mga isda sa Bureau of Fisheries and Aquatic Resources (BFAR) agud matsekyar kun kuha gid man ini sa dynamite fishing.
