ROXAS CITY – Arestado ang duha ka persona matapos nga naglapas sa ginpatuman nga curfew hours sa probinsya.
Una diri nadakpan sa Barangay 6, Roxas City si June Anthony Magbanua 29-anyos sang Barangay Buyag, Dumarao, Capiz.
Base sa inisyal nga imbestigasyon sang Roxas City Police Station nga naabtan ini sang pila ka mga opisyales sang barangay nga nagalakat-lakat sa dalanon sa oras sang curfew kag yara sa idalom sang impluwensya sang makahulubog nga ilimnon.
Ginapahayag nga ginbadlong pa ini apang wala man nagpati rason nga gindala na lamang ini sa pulisya para sa nagakaigo nga disposisyon.
Samtang, dakop man ang 47-anyos nga persona sa Barangay Bula, Mambusao, Capiz.
Ginapahayag nga gikan sa banwa sang Sapian si Jerry Penalba sang Barangay Poblacion kag tuyo kuntani nga magpadulong sa banwa sang Mambusao agud magbakal kuntani sang bulong.
Ginhambalan pa ini sang mga otoridad nga sarado na ang botika sa amo nga banwa apang wala ini nagpati rason nga gindala na lamang ini sa pulisya.
Mahibaluan nga ginapatuman sa karon sa bilog nga probinsiya sang Capiz ang curfew hours humalin alas 8 sa gab-i tubtob alas 5 sa aga base sa Executive Order No. 11, series of 2020 nga ginpapanaog ni Capiz Governor Esteban Evan Contreras.
