PANAY, CAPIZ – Arestado ang duha ka mga persona sa ginpatigayon nga drug buybust operation sang gintingub nga pwersa sang Provincial Drug Enforcement Unit, Philippine Drug Enforcement Agency (PDEA-6) kag Panay PNP sa Barangay Candu-al, Panay, Capiz.
Ginkilala ang mga arestado kay Jericho Besorio, 21-anyos sang Barangay Bago Grande, Panay, Capiz kag John Anthony Bernas, 18-anyos, grade 11 student kag residente sang Barangay Bago Chiquito, Panay, Capiz.
Narekober sa posisyon sang mga suspek ang tatlo tanan ka sachets sang ginapatihan shabu, isa ka cellphone kag isa ka unit sang motorsiklo.
Nakahunong na karon sa karsel sang Panay Municipal Police Station ang mga suspek.
Natalana naman nga pasakaan sang panumbungon nga paglapas sa RA 9165 ukon Comprehensive Dangerous Drugs Act of 2002 ang mga suspek.
