ROXAS CITY – Arestado ang duha ka mga drug personality sa drug buy bust operation sang gintingub nga pwersa sang Station Drug Enforcement Team sang Pontevedra, Pilar, President Roxas Municipal Police Station kag Provincial Drug Enforcement Unit sang Capiz Police Provincial Office (CPPO) sa Barangay Tabuc, Pontevedra, Capiz.
Ginkilala ang mga drug suspek nga sanday Kir Niecho Dadivas 22-anyos sang Barangay Linampongan, Pontevedra kag Aldwin Daria 22-anyos sang Ilawod, Pontevedra, Capiz.
Nakapalagyo naman ang isa ka upod sang duha nga si Jeffrey Dilao sang Barangay Linampongan, Pontevedra, bangud madasig ini nga nakadalagan palayo matapos nagtuyo nga magpalagyo sakay sa motorsiklo sa nagalagas nga mga pulis.
Apang malas nanday Dadivas kag Daria nga wala gilayon nakatindog sang matumba ang ginasakyan nga motorsiklo bangud sa naangkon nga samad.
Suno kay Police Major Christopher Candelario, hepe sang POntevedra PNP nga daku nga accomplishment ini sa ila nga istasyon bangud yara sa Directorate for Intelligence (DI) list sanday Dadivas kag Daria, college graduate nga wala sang permanente nga trabaho.
Narekober sa mga drug suspek ang 18 platic sachet sang ginapatihan shabu nga may market value nga P18,000, P1,000 nga buy bust money kag motorsiklo nga gingamit sa iligal nga aktibidad.
Nahibaluan nga nabungguan sang mga suspek nga sakay sang motorsiklo ang puno sang palma sa pagdali dali nga makapalagyo, sa diin nabali pa ang tiil ni Dadivas.
Samtang, gindala na sa PNP Crime Laboratory sa Iloilo City ang mga suspek para magpaidalum sa medical examination kalakip na ang nakumpiskar nga mga sachet sang shabu.
