ROXAS CITY – Nagaaway subong ang duha ka mga persona nga imbolbado sa duha ka Investment Scheme sa Capiz.
Ini ang ginkompirmar sang isa ka negosyante nga nagpa-blotter sa Roxas City Police Station matapos nga ginaalegar ginpahog sang kilala man nga negosyante sa siyudad sang Roxas.
Sa interview sang Bombo Radyo kay Jannette “Barbz” Vasquez nga ginaalegar ginpahog ini ni Patrocenio Chiyuto Jr., ukon mas kilala sa tawag nga Don Chiyuto.
Ini may kaangtanan sa duha ka investment scheme sa siyudad kun sa diin miyembro ang duha ka nasambit nga persona.
Suno kay Vasquez nga ginaalegar ginpasimandan siya ni Don Chiyuto nga siya ang nagpalapta sa mga investors nga scammer ang nasambit nga negosyante apang hugot niya man ini nga ginpanginwala.
Sa baylo gin-abisohan pa sini suno sa natungdan ang mga naga-invest kay Chiyuto nga mangin maalam sa pag-invest sang ila nga kwarta.
Kasunod sini, gintawgan ni Don Chiyuto si Vasquez kun sa diin nakarekord mismo sa iya cellphone ang mga pamahog nga ginhambal sa iya sang amo nga negosyante nga pugotan siya sang ulo.
Bangud diri, nagdesisyon si Vasquez nga ipa-blotter sa Roxas City Police Station si Don Chiyuto bangud man sa pagkahangawa sini nga may yara sang malain nga matabo sa iya kag sa iya man pamilya.
Dugang pa ni Vasquez nga halos ginakontra siya sang kadam-an bangud sa ginaalegar siya ang nagpangolekta sang mga kwarta nga naga-invest sa ila nga Investment Scheme nga Big Dreams International (BDI) samtang kay Chiyuto naman amo ang Chiyuto Creative Wealth Document Facilitation Services (CCWDFS).
Suno pa kay Vasquez nga may yara sang nagalapta nga istorya nga ginkuha sini ang kuwarta rason nga wala nakabalik sa mga investors nga nag-invest sa ila kabangdanan naman nga nagsaylo ang mga ini kay Don Chiyuto.
Apang hugot niya man ini nga ginpanginwala bangud suno sa iya alegasyon lamang ini batuk sa iya gani kinahanglan nga pamatud-an sang mga tawo nga matuod ang nagalapta nga impormasyon.
Matandaan nga nagpatawag sang presscon si Vasquez natuhoy sa nasambit nga pagpamahog sa iya ni Don Chiyuto.
