ROXAS CITY – Pilason ang duwa ka lalaki matapos nga bumunggo ang ginamaneho nga motorsiklo sa kasugata nga salakyan sa Arnaldo Blvd. Barangay Baybay Roxas City.
Ginkilala ang driver sang motorsiklo kay Jhon Richen Lugo, 20-anyos samtang ang backrider amo si Andrie Mark Jordan, 18-anyos kag lunsay mga residente sang Brgy. Sta. Cruz banwa sang Ivisan.
Sandig sa imbestigasyon sang Roxas Component City Police Station, samtang ginasubay ni Lugo ang dalanon sakay sa Suzuki Raider 150 nga motorsiklo aksidente ini nabunggo sa kasugata nga Toyota Wigo Hatchback nga salakyan nga ginamaneho ni Mary Jane Andrada, 27-anyos kag residente sang Brgy Cabugao sa nasambit nga syudad, nga gintunaan sang pagkatumba sang nasambit nga motorsiklo.
Bangud sa impact, nag-angkon sang bali sa natuo nga tuhod si Lugo kag pilas sa magkatuhay nga parte sang lawas amo man ang backrider sini.
Madasig naman nga ginrespondehan sang katapo sang Roxas City Emergency Response Team (RCERT) ang mga napilasan kag gindapatan sang nauna nga pagbulong kag ginpadangat sa separado nga ospital.
Samtang, ginkustodiya sang RCPS ang nadalahig nga mga behikulo para sa nagakaigo nga disposisyon.
