PANITAN,CAPIZ – Pilason nga ginpadangat sa Roxas Memorial Provincial Hospital ang mga sakay sang salakyan matapos nahulog sa isa ka uyapad sa Barangay Concencia, Panitan, Capiz.
Ginkilala ang mga biktima nga sanday Jamel Dalidig, 21 anyos (driver) kag kaupod sini nga si Orlan Develos, 23 anyos nga lunsay mga residente sang Barangay Banggaan, Panitan, Capiz.
Sandig sa inisyal nga impormasyon nga naggikan ang duha ka mga sakay sang amo nga salakyan sa Barangay Bailan, Pontevedra kag padulong na kuntani sa Barangay Banggaan, Panitan sang hinali na lamang nga naglapaw ang salakyan sa karsada kag nagbunggo sa isa ka bato nga ginatabunan sang trapal.
Bangud diri, nag-angkon sang mga kapilasan sa lawas ang duha ka mga biktima nga gilayon naman gindapatan sang nagakaigo nga pagbulong.
