FRANKFURT, Germany-Patay ang duha ka Pilipino samtang walo pa ang seryoso nga napilasan matapos maaksidente ang isa ka coach bus nga nagadala sang grupo sang mga Filipino turista padulong sa Oktoberfest sa Munich, Germany sang Domingo.
Suno sa Upper Bavaria Police, nagluntad ang aksidente pasado alas-6 sang aga, oras sa Germany, sa isa ka motorway malapit sa Buchloe kag malapit sa border sang Austria. Ginalantaw sa inisyal nga imbestigasyon nga naghalin sa dalan ang bus antes ini nagbaliskad.
May yara sang 33 ka Filipino nga turista kag duha ka Italian drivers sa coach nga gin-charter sang isa ka travel company. Lakip sa duha nga napatay ang isa ka 58-anyos nga lalaki, samtang wala pa makumpirmar ang pagkakilala sa ikaduha nga biktima.
Nagresponde ang daku nga numero sang emergency personnel sa lugar sang aksidente kag temporaryo nga ginsiraduhan ang motorway sa duha ka direksyon.
Samtang, ginpahayag sang Philippine Consulate General sa Frankfurt nga nakipag-angot ini sa German police kag iban pa nga awtoridad para sa paghatag sang bulig konsular sa mga Filipino nga naapektuhan, lakip na sa ila mga pamilya. Ginpahayag man sang konsulado ang pagpaabot sang ila pinakamadalum nga pakipag-unong sa mga pamilya sang mga napatay kag suporta sa mga napilasan.
