Nag-angkon sang kahalitan ang duha ka mga salakyan kag isa ka tricycle matapos nagbungguanay sa Arnaldo Boulevard, sining syudad.
Ginkilala ang mga driver sang salakyan kanday alyas Dennis, driver sang Toyota Vios, 34-anyos kag residente sang Capricho II, Brgy. 2 sining syudad samtang ginkilala naman kay alyas Norlie, driver sang Mitsubishi Pajero, 39-anyos kag residente sang Westlake Subd., Brgy. Dayao, Roxas City, samtang ang driver sang tricycle ang ginkilala kay alyas Mark, 37-anyos kag ang iya sini nga asawa nga sakay nga si alyas “Cath”, 36-anyos kag lunsay mga residente sang Brgy. Gabuan, sining syudad.
Sa nakuha nga impormasyon sang Bombo Radyo nagikan sa Roxas City PNP, ginapahayag nga samtang nakaparking sa higad sang karsada ang salakyan nga Mitsubishi Pajero, hinali sini nga natapakan ang acceleration pedal samtang nagalimpyo sang pungkuan, kabangdanan nga nag-abante ang iya salakyan kag nagresulta sa pagkabunggo sa nakapark man nga salakyan nga Toyota Vios.
Bangud sa makusog nga impact, nag-abante man ang vios kag bumunggo man sa naka park nga tricycle.
Sa karon, yara na sa paghinakop sang Roxas City PNP ang mga imbolbado nga mga behikulo para sa nagakaigo nga disposisyon.
