ROXAS CITY – Pilason ang duha ka mga senior citizen matapos nga ginaalegar na hit and run sa Barangay Rizal, Pontevedra, Capiz.
Ginkilala ang mga biktima nga sanday Ernie Taroballes 77-anyos kag Romulo Batuigas 64-anyos lunsay mga residente sang Barangay Bailan sang nasambit nga banwa.
Sandig sa inisyal nga imbestigasyon sang Pontevedra Municipal Police Station nga samtang ginasubay sang mga biktima ang dalanon sakay sa motorsiklo sang hinali na lamang nga nag-overtake sa natuo nila nga porsyon ang isa ka Suzuki 105 nga motorsiklo nga nagaduag pula kag itom kag wala pa sang plate number.
Bangud diri, natumba ang motorsiklo sang mga biktima matapos nga ginaalegar ginbungguan sang wala matumod nga driver sang nag-overtake nga motorsiklo.
Nag-angkon naman sang pilas sa lawas ang mga biktima nga gilayon naman gindala sa Bailan District Hospital para sa nagakaigo nga pagbulong.
Samtang, nagapadayon naman ang imbestigasyon sang mga kapulisan sa insidente.
