Ginpresentar ni Vatican’s Cardinal Secretary of State Pietro Parolin, nga nagapanguna sa mga cardinal elector, ang duha ka sahi sang mga sulat gikan sa nagtaliwan nga lider sang Simbahan Katoliko nga si Pope francis, sa ginpamatbatan nga si Cardinal Angelo Becciu.
Diri, gindumilian si Becciu nga magpartisipar sa palaabuton nga conclave ukon pagtililipon sang mga Cardinals sa pagpili sang masunod nga Santo Papa.
Base sa report sang isa ka Italian newspaper, si Cardinal Parolin nagdala sang mga sulat nga ginpirmahan sang nagtaliwan nga Santo Papa nga may inisyal nga “F”.
Ang isa sa mga sulat halin sang 2023 kag ang isa naman halin sang nagligad nga bulan samtang nagasupreher sang balatian ang nagtaliwan nga pontiff.
Antes ginpaguwa ang nasambit nga mga sulat gikan sa Santo Papa, una nga gindemanda ni Becciu nga may kinamatarong sia sa pagtambong kag pagboto sa conclave.
Sa isa ka interbyu sa Cardinal sang Abril 22, isa ka adlaw pagkatapos sang kamatayon sang Santo Papa, ginpahayag sini nga gin-ako sang nagtaliwan nga Santo Papa nga ang iya cardinal prerogatives indi subject sa pagbag-o bangud wala sang explicit will nga nagadumili sa iya sa pagpartisipar sa conclave ukon sa pagpangabay sang iya explicit renunciation paagi sa pagsulat.
Madumduman nga si Becciu ang ginsentensyahan sang Disyembre 2023 sang lima ka tuig nga pagkapreso bangud sa embezzlement kag fraud.
Siya ang una nga mataas nga opisyal sang Simbahan Katoliko nga nag-atubang sang isa ka trial sa Vatican criminal court.
