ROXAS CITY – Karsel sang Roxas City Police Station ang gindangatan sang duha ka mga driver matapos nga ginaalegar tuyo nga bun-on ang duha ka mga miyembro sang Capiz Provincial Mobile Force Company (CPMFC) sa Barangay Lanot, Roxas City.
Ginkilala ang mga suspek nga sanday Teodoro Panday, 28 anyos sang Barangay Lanot sining siyudad kag Glenn Basulgan, 26 anyos sang Barangay Jolongajog, Pontevedra, Capiz.
Base sa inisyal nga imbestigasyon sang Roxas City Police Station nga naggikan ang mga biktima nga sanday Police Corporal Lucila Boy, 29-anyos sang Barangay San Pedro, Pilar kag Police Corporal Junnette Mae Bernada 29-anyos sang Barangay Dinginan sining siyudad sa isa ka restaurant sa diin pabalik na nila sa kampo, nanotisyar sang mga ini nga ginasundan sila sang nasambit nga mga suspek nga sakay sa motorsiklo kag tricycle.
Kasunod diri, nagpakilala ang duha ka mga kababainhan sa mga suspek nga katapo sila sang mga kapulisan apang ginsabat pa sila sang mga ini nga kasubong wala sila sang labot.
Ginaalegar nga gintayaan pa sang mga suspek ang duha ka mga biktima gamit ang isa ka kutsilyo nga gilayon man ginrespondehan sang mga kapulisan gikan sa kampo.
Ginapahayag nga yara sa idalom sang impluwensya sang makahulubog nga ilimnon ang mga suspek.
Sa karon yara na sa kustodiya sang Roxas City PNP ang nasambit nga mga suspek para sa nagakaigo nga disposisyon.
