ROXAS CITY – Duha ka driver sakay sa mga motorsiklo ang nasiplatan nga nagalagaw sa oras sang ginapatuman nga curfew sa Barangay Baybay, Roxas City.
Suno kay Police Staff Sergeant Vincent Soberano nga samtang naga-duty ini sa nasambit nga lugar nasiplatan sini ang duha ka wala matumod nga driver sang motorsiklo nga padulong kuntani sa People’s Park rason nga gintawag niya ang mga ini para kuntani usisaon.
Apang sa baylo nga magpundo ang duha ka mga driver, ginpadasig pa nila ang pagpadalagan sang ila mga motorsiklo padulong sa City Proper rason nga ginlagas ang mga ini sang nasambit nga pulis.
Samtang, padayon nga ginalagas ni Soberano ang duha ka driver, narekober na lamang sini ang isa sa duha ka motorsiklo nga suzuki raider J150 nga nagaduag itom kag may plate number nga FA 34857 sa diin ginbilin sang wala matumod nga driver sa guwa sang balay ni Alyas Bong Berlandino.
Bangud diri, ginpakamaayo na lamang sang amo nga pulis nga dal-on sa Roxas City Police Station ang amo nga motorsiklo para sa nagakaigo nga disposisyon.
