CUARTERO, CAPIZ – Patay ang duha ka lalaki samtang isa naman ang nagapabilin sa ospital matapos makuryente sa Barangay Puti-an, Cuartero, Capiz.
Ang mga napatay amo sanday alyas Reymart, 26, isa ka Barangay Tanod sang Barangay Mahunodhunod kag alyas Sonny, 42, isa man ka Barangay Tanod sang Barangay Puti-an samtang ang pilason naman amo si alyas Gabby, legal ang edad, residente sang Barangay Mahunodhunod.
Sa interview sang Bombo Radyo kay Police Captain Jesse Lepaña, Officer-in-charge sang Cuartero Municipal Police Station, iya ginpahayag nga nagabulig ang tatlo ka mga lalaki sa pagtukod sang tolda sang napatay sa Barangay Puti-an.
Suno kay Lepaña, may yara sang tubo sang WiFi nga ginkaptan ang mga biktima kag naigo ini sa live wire sang Capiz Electric Cooperative (Capelco).
Sanday Reymart kag Sonny ang wala na matabangan pa samtang si Gabby naman ang nagtabog kag nag-igo ang ulo sini sa semento kag gilayon nga gindala sa ospital.
Sa subong, padayon pa nga ginabulong sa ospital si Gabby.
