Pilas sa magkatuhay nga parte sang lawas ang naangkon sang duha ka driver sang motorsiklo matapos magbungguanay sa Barangay Adlawan, Roxas City.
Ginkilala ang driver sang Yamaha Mio Aerox kay alyas “Kenneth”, 23-anyos kag residente Bakhaw, Manduriao, Iloilo City, samtang ang driver naman sang Honda Click nga motorsiklo ang ginkilala kay alyas “Ronge”, 20-anyos kag residente sang Brgy. Adlawan, Roxas City.
Sa impormasyon nga nakuha sang Bombo Radyo nagikan sa Roxas City Police Station, ginapahayag nga samtang ginasubay sang pareho nga mga drayber ang dalanon sang Brgy. Adlawan, hinali nalang nga nagbungguanay ang mga ini sakay sang ila motorsiklo.
Dugang pa nga padulong kuntani si alyas “Kenneth” sa Sitio Liong, gikan sa Crossing sang nasambit nga barangay, apang padulong man kuntani si alyas “Ronge” sa Crossing, gikan sa Sitio Liong sang nasambit nga barangay.
Nag-angkon sang pilas sa tuo kag wala nga tiil, kag nagpalanakit ang likod ni alyas “Kenneth” kag alyas “Ronge” nga gilayon naman nga gindapatan sang pauna nga pagbulong sang mga katapo sang Roxas City Emergency Response Team.
Sa karon, yara na sa paghinakop sang Roxas City PNP ang pareho nga mga behikulo para sa nagakaigo nga disposisyon.
