IVISAN, CAPIZ – Nagapabilin sa Municipal Agriculture’s Office sa banwa sang Ivisan ang duha ka mga motorbanca nga nadakpan nga nagapatigayon sang ilegal nga pagpangisda sang mga katapo sang Philippine Coast Guard-Ivisan.
Suno kay PCG-Roxas Station Commander Edison Diaz, nadakpan ang MB Liam Eda kag MB Liam Zeed sa Mabaay Island, banwa sang Ivisan.
Kalakip sa nadakpan nga mga tripulante sang nasambit nga motorbanca sanday Ruben Bayola, Erwin Dordas kag iban pa nila nga mga kaupdanan.
Ang nasambit nga mga tripulante ang naglapas sa ordinansa nga nagadumili sa paggamit sang active fishing gears sa pagpangisda.
Ginpasiguro naman sang talatapan sang PCG nga wala sila nagauntat sa ila masangkaron nga kampanya batuk sa mga nagapatigayon sang ilegal nga pagpangisda.
