ROXAS CITY – Duha ka separado nga insedente sang pagkalumos ang nahinabo sa duha ka banwa sa probinsiya sang Capiz sa diin duha ang patay kag isa ang missing tobtob sa karon.
Bangkay na sang makita ang isa ka pastor nga ginkilala kay Nestor Franco 52-anyos sang Barangay Duran, Dumalag, Capiz matapos malumos samtang nagapadayun ang search and retrieval operation sang Capiz Emergency Response Team (CERT) kag response unit sang banwa sang Dumalag, Capiz sa asawa ni Pastor Nestor nga si Celine Franco.
Suno kay Jovel Dacutan Municipal Disaster Risk Reduction and Management Officer MDRRMO- Dumalag una nga nagtabuk sa overflow si Pastor Nestor para magdul-ong sa pihak nga pangpang ang ila nga gamit.
Matapos madul-ong ang gamit ginbalikan sini ang asawa apang sang nagatabuk na sila sa overflow gin-anod sila sang mabaskog nga ilig sang tubig.
Sa pihak nga bahin malamig nga bangkay na sang makita ang tatlo ka tuig nga bata nga nalumos sa sapa sa Barangay Switch, Tapaz, Capiz.
Nahibaluan nga magkaupod ang biktima kag ang iya iloy sang nagtabuk sa tulay apang dimalas nga ini ang mahulog kag gin-anod sang tubig.
