ROXAS CITY – Lunsay patay ang mga driver sang motorsiklo kag traysikol, matapos ini magbungguanay sa dalan nga sakup sang Barangay Indayagan, Maayon, Capiz, alas-11:30 kagab-i sang Miyerkules, Noyembre 30.
Ginkilala ang driver sang traysikol kay Milbert Estores, 47-anyos, balot vendor, kag residente sang Brgy. Calaan, banwa sang Panit-an.
Samtang ang driver sang Suzuki raider 150 amu si Alvin Ilagan, 22-anyos, residente sang Poblacion Ilawod, banwa sang Maayon.
Sandig sa inisyal nga impormasyon nga nakuha sang Bombo Radyo sa Maayon MPS, nga samtang ginasubay sang traysikol ang amu nga dalan papauli kuntani sa Panit-an, sang hinali ini nga nabungguan sang Suzuki raider nga ginpahayag nag-overtake sa isa ka motorsiklo.
Bangud sa mabaskog nga impact sang pagkabunggo, nag-angkon sang patal nga pilas sa lawas ang duha ka mga drivers.
Gindeklarar nga dead on arrival sang doktor sa Bailan District Hospital si Ilagan, samtang wala man nakasalbar sa kamatayon si Estores sang ginpadangat sa RMPH.
Padayon ang imbestigasyon sang mga kapulisan sa nasambit nga aksidente.
