ROXAS CITY – Arestado ang duha ka mga persona sa ginkasa nga drug buybust operation sa Barangay Cagay, Roxas City.
Ang nasambit nga operasyon ang ginpatigayon sang gintingob nga pwersa sang Philippine Drug Enforcement Agency (PDEA) kag Roxas City Police Station.
Suno kay Police Master Sergeant Ramil Arcangeles, tagpamaba sang Roxas City PNP, ginkilala ang mga nadakpan nga sanday Alfred Jaguio, 43 anyos sang Barangay Tanque kag Feb Almia, 34 anyos sang Barangay Cagay.
Narekober sa mga ini ang lima ka sachets sang shabu, P20, 000 nga buybust money, isa ka motorsiklo, cellphone kag isa ka wallet.
Suno kay Arcangeles nga ang narekober nga ilegal nga droga ang ginabulubanta nagabalor sang kapin P600, 000.
Ginpahayag pa ni Arcangeles nga madugay na nila nga gina-monitor ang ilegal nga aktibidad ni Jaguio.
Suno diri nga kalakip sa Directorate for Intelligence (DI) list ang pangalan ni Jaguio samtang nag-surrender pinaagi sa Oplan Tokhang si Almia.
Magapangatubang ang mga suspek sang panumbungon nga paglapas sa Republic Act 9165 ukon Comprehensive Dangerous Drugs Act of 2002.
