Dakop sang Bureau of Immigration (BI) ang 2 South Korean nationals, nga wanted sa ila pungsod bangud sa pag-import sang ilegal nga droga kag pagtukod sang gambling facilities, subong nga Dominggo, Setyembre 22.
Ginkilala sang ahensya ang mga ini nga sanday Nam Sundong, 37-anyos, kag Lee Hyunhak, 23-anyos, nga pareho nga may red notice gikan sa International Criminal Police Organization (Interpol) kag pareho nga may kanselado nga passports halin sa gobyerno sang South Korea.
Suno sa Bureau, si Nam ang wanted sang Ulsan District Court sa ila pungsod sumugod pa sang 2023 bangud sa pagtukod sang gambling facilities kag paglapas sa criminal act sang Korea.
Samtang si Lee naman ang wanted bangud sa drug smuggling, ukon pag-import sang 480.85 grams sang methamphetamine sa Korea, nga nagalapas naman sa Korea’s Act ukon Aggravated Punishment of Narcotics Smuggling.
Naka-detain na sa karon ang 2 Koreans sa Bureau of Immigration sa Taguig City samtang nagahulat sang deportation.
